陸羽仁-投機  ，  描述： 國際賭馬集團如何運作

上次牛腩貓咪問我「如何增加投機的機率」，我結果答咗佢要控制風險，先諗輸再諗贏，佢可能覺得我牛頭唔搭馬咀，所以再問。

其實投機成功機會率同控制風險有密切的關係，並非三言兩語講得清楚，不如我用一個例子解釋俾大家聽。

我有一次和一個國際賭博集團的要員吃飯，他們在香港賭馬贏大錢，我順便請教一吓他們如何運作。當時已經是幾年前，香港賽馬會和政府分帳還是行舊制，即是政府不理馬會賺蝕，先要抽稅，簡言之是在一場馬的投注總額中，政府抽稅加馬會抽水，夾埋先抽走30%，其餘70%才用來派彩，即係好似四個人在士多內打麻雀，每一舖打完士多老闆都要向食糊者抽30%水，食糊者只能拿走70%，咁樣長賭下去好易輸，好有可能四個人都輸，只有抽水的士多老闆贏錢。

我的問題係「政府和馬會先抽走彩池的30%，在這場不公平的比賽中，賭博集團如何可以贏錢呢?」那個賭博集團要員話，賭博集團落場賭馬，的確先讓了30%，即是好似4個人打麻雀，若4人的牌技和運氣一樣，每人的平均取勝機會本來有25%，但俾人抽水30%之後，等如每人平均取勝機會只有17.5%，抽水太深令贏錢機會大減。不過賭博集團在這場遊戲仍然有錢贏，係因為佢地係同散仔對賭，散仔賭錢方法太唔專業，所以輸到開巷，令賭博集團在被政府和馬會抽完水之後，仍然有錢贏。

佢舉個例，除非好例外的馬王，否則一匹熱馬，在一場中取勝機會唔超過50%，但散客喜愛買熱馬，因為容易中，有錢攞好開心，所以住住買熱馬買到賠率跌到不合理的水平，賠率跌低過2倍時，就進入不合理的境界，但散仔仲會不斷買。

賭博集團就係用科學的方法，做齊功課，研究每一場每一匹馬的往績，將結果入哂電腦，用來推算每一場每一匹馬取勝的機會率（勝出率），用這個勝出率來對比賠率，若發覺兩者有明顯差距，即某一匹馬的勝出率較高，但賠率卻不合理地高時，出現賠率差距時，佢地就會落注買這匹馬。賭博集團不是一場買一匹馬，而係買4、5匹有賠率差距的馬，亦經常用這些有賠率差的馬落大注串三T，實行大包圍。賭博集團以專業方式將勝出率配合賠率一起研究，和盲目下注的散戶對賭，所以即使要俾政府和馬會大抽水，仍然可以打贏散戶贏大錢。其實賭博集團做的事情，似投機多過賭博。

套用同一個邏輯，究竟我們對個股和對大市投機時做了多少功課，來增加勝出率呢?以個股為例，一隻股上升等如取勝(因為你隨時可以計數離場)，你做了乜嘢研究，去判定佢短線、中線、長線上升的機會呢?股價等如賠率，股價愈係不合理地低、可能上升的空間愈高，若上升機會高股價低，等如出現賠率差距，買入的贏面就會較高。

散戶如果只係聽個冧巴，盲目去買股，其實同買馬沒有分別，你要知道，若有專業人士(例如莊家)在炒同一隻股，散戶盲目買的贏面有多大，可想而知。綜合而言，若以投機個股而論，公司股價短期上升的可能性及股價高低，係決定炒個別股票的取勝機會的基本關鍵。

a nice one, thanks

昨天講到投機時要考慮勝出率和賠率，但這並不是投機的全部，投機的另一大學問是控制風險。又以賭博集團買馬為例，一場14隻馬出賽，佢地並唔係買一隻馬，而係買4、5隻有賠率差距的馬，若賭三T，亦係三場每場買4、5隻咁串，這亦等如炒股分散投資，個市有成千隻股票，唔需要將所有注碼瞓身買一隻股票，將全副身家合埋眼買一隻股票，萬一隻股票個老闆俾人拉咗、死咗，隻股無限期停咗牌、執咗咁點算，你唔可以盲目瞓身買一隻股票，最後輸清就怪俾冧巴你的人，你以這種手法去買，同用全副身家賭一場馬其實分別唔大。控制注碼，分散買不同的股票，就減少一隻唔中就輸清的風險。

若果你以一個賭仔心態諗，會覺得買幾隻唔係好化算，一場14隻馬，只有1隻第一，假設佢獨贏1賠5，買一隻中咗賠5，同買3隻落3注亦只係賠5，好似單買一隻好啲，成本輕啲。我就話除非你知道邊隻一定跑出，否則分散一點注碼，增加買中機會，長賭較易贏。雖然股票可以唔止一隻升，可以係隻隻升，但買死一隻風險大啲，好難控制。

除咗分散風險之外，亦要控制注碼，買馬和買股不同，一般人買馬會預咗輸，但買股買輪唔會預咗輸清。你預咗輸清，自然唔會落咁大注碼，這就是我經常講的例子，你買馬唔會一場買10萬，博佢中就中40、50萬，輸就輸哂，你會覺得輸的機會都唔細，所以唔會買咁多。你買窩輪買牛熊證就唔同，好多人買10萬、20萬面不改容，而且一係唔買，一買親就想刀仔鋸大樹，博買中10萬變50萬。唔係話窩輪唔可以升4、5倍，但佢同樣有機會變到零，你用10萬買輪，唔緊要，定好計劃跌到乜位打靶，例如最多輸3萬，就跌夠30%合埋眼就止蝕。但不少人唔定止蝕位，或者定咗止蝕位又唔執行，見到輸3萬時仲會去睇吓價，輸到5萬時無眼睇，唔肯面對，結果10萬元輸清。

所以止蝕係控制注碼的一個方法，控制你每一次投機可能損失的注碼，增加長線的取勝機會。好多人將投機睇成一次一次的割裂的事件，我就看成一個整體，睇一年的投機，睇一個總和，唔係睇一次的成敗。投機10次中6次，輸4次，淨贏兩次，如果每次贏一成輸又係輸一成的話，夾埋就係贏。

所以綜合而言，如果牛腩貓咪問我「如何增加投機的機率」，我覺得起碼要分幾部份，包括透過研究分析下注產品的取勝率，選擇賠率較高的時機，透過分散目標減少一Q中伏的風險，定好止蝕，減少注碼損失，做齊這4件事，就可以長線、整體地增加投機成功的機率。