304#
大 中
小 發表於 6-2-2013 05:57 PM 顯示全部帖子
賽道分析：谷草A欄踏入季中偏差唔算大，唯一要留意中後置內疊馬有機會因彎位唔銳而塞死，賽前以馬匹能力行先。
第一場 5班 1200米
「好精伶」低班組別忠心好馬，常追一段23秒以內嘅後勁，剛戰A欄內疊衝得唔順仍能入Q，轉谷草再戰起用柏寶可再勝。「時尚風華」上季於4班田草1400跑近，季內初轉谷草即賺級數嬴馬，今次預期步速可再賺，檔好繼續積極備戰未可輕視。「嘻哈大少」再抽一檔，輕磅賺跑法可再拖。「電訊超星」排10檔，剛戰賺場地下左穿右插嬴田草1400米，本身雖3戰谷草均落敗，但兩戰同程落敗唔係氣管多痰就多血，10檔相對較相近有中距離級數嘅「飛天龍駒」易切入追，續兼顧。
「飛天龍駒」小休再出有邊線機會。「華劍寶」剛戰際遇差而近仗前速唔銳利，今次要變身才可切入一鬥。「利圖」復課轉積極初戴眼罩，但上仗賺完衝落一般要進步好多先得。「寶德」大賺場地嬴田草1000超弱組，轉谷草前速唔太銳利難再爆。「劍臣」閹後進步不大。
第二場 4班 1200米
「升力」上次已指出前次3班強組追近絕不簡單，落4班必有利，上仗如非走不利場地及受阻最利有亞席，今次續用何澤堯跑弱組而成冷繼續追捧。「電訊太子」剛戰初出田草弱組追近，但直路早段受阻要移出更外衝，勢頭比該仗一齊追及後補中嘅「貝利奇」更好，血統谷草適應力不成問題，有內檔較易發揮要睇實。「團隊精神」9歲老馬陣上常見追勁，無保留會盡用，唯一馬性外疊衝較好，今次內檔考騎者發揮。「橫掃千軍」比上季嬴4班時進步，田草都跑得唔錯，剛戰直路蝕位不少力追，惜蝕得更多嘅「比你高」再出唔得，只宜作配。
「馬得利」上戰柏寶騎得出色姿態尚輕鬆，轉12檔要睇場地及際遇，增至132磅排12檔列邊線腳。「御將軍」4班有利，但近況甚一般內側快馬多一位已難。「咁都得」未跑得返。「元豐泰」剛戰第3名賺完對前2名毫無威脅。
第三場 4班 1650米
「烈風天馬」大前仗能嬴當時甚銳嘅「龍船快」，而前仗亦只負於3班能力嘅「福喜」，搵啱中距離出路能力至少值4班頂，剛戰直路未能望空衝刺當一場回氣賽，回配最佳拍檔梁家俊作膽最穩。「神勇馬車」蝕位甚多下追得不俗，表現比「財源來」更好，賽前再拍跳試埋大閘夠積極，以往模式密跑會更好。「神州八號」上仗沿途放得唔慢，鬥至最後一百米受阻才輸得較遠，今仗步速中等3檔可守好位再爭。「旅遊小子」前仗首段快開切入一疊好位，雖賺場地形勢，但以輕鬆姿態嬴其後入Q嘅「輕越直前」，今仗轉用吳嘉晉如釋重負，跟到前就有位望。
「路路發」初戴頭罩存變數，計馬4班夠用的，唯上仗守好位不敵走3疊嘅「鼓浪春風」，只宜配。「財源來」表現不及「神勇馬車」，入冷位後成熱才不作考慮。「綻放美麗」轉倉大幅增程作賽，賽前操得甚足，但未有氣量經驗被熱捧便不值。
第四場 4班 1800米
「回鄉精神」早前兩仗雖賺慢步速嬴，但姿態極輕鬆，而多匹蹄下敗將能有好表現，如「太奇妙」､「自成一格」､「喜寶龍威」､「永勝多」､「叫關快」､「甜情蜜意」等等，上仗早段被「輕越直前」燒早大半程，直路早段仍衝而嬴其後再出入Q嘅「輕越直前」，今仗增程作賽，血統宜長，而且配馬房合作愉快嘅吳嘉晉負中磅作賽，同場冇快馬半冷可勝。「永勝多」上季3班連番不利形勢追入位列，現時4班53分仍有利，學識跟前纏鬥2檔跟前駒跑可一爭。「綠豆爽」上仗慢步速能以快總末段一秒段速追近，谷草中距離能做出23秒末段嘅馬唔常見，證明場地適應冇問題，轉用柏寶發揮後上馬顯決心，3強之一。「好旺財」前仗慢步速唯一一匹後列馬追近，比及後轉田草嬴嘅「碧玉釵」追得更勁，剛戰亂放快步速斷，回氣一場轉爭擅長嘅谷草可賺慢步速拖回馬槍。
「可愛人生」落4班有利，但操練唔積極未強返眼罩先等一等。「足智多謀」谷草夠準但應止於T/F4腳。「萬眾期待」轉倉未見能力減退惜12檔難跑只宜作配。
第五場 3班 1000米
「捉金」谷草1000極準，無論內外檔都未失前3名，匆匆再出復課見呂卓賢有操，或馬房唔放人用返鄭雨滇威力不減，仍夠爭3甲。「超新鮮」適應步速後表現有進，1檔放出場地冇偏差可續爭一席。「百戰百勝」出自谷草特佳血統Not a single doubt，初出段段快跟泥地賽唔太斷，發熱退出後重新做好功夫才出，步速快12檔隨時可像「好利佳」般加入戰團。「好友星威」上仗初跑3班意外地表現唔差，適應一仗或可再進，列保險腳。
「四季星」上仗追得不過不失，再蝕住追未可反先「捉金」。「火燎腚」跑1000比1200更好，近仗步速唔快未盡合發揮，T/F4冷腳勿忘。
第六場 3班 1200米
「勁飛駿」轉呂廐後試準，上仗輕鬆力追「好精神」，轉完彎蝕多好多的，今次回配拍檔柏寶可反先。「驚雷」忠心準繩而且季內能力拼「山頂」，上仗初戴眼罩直路數度受阻拉慢，最後幾步衝落一D都唔差，薛寶力難得搵到新合作機會必盡拼。「信心十足」剛戰雖於田草1400大賺步速失望落敗，但前次跑谷草能力追「強風駿馬」而壓倒及後補中嘅「新力飛」，12檔留返住嚟衝或能重現威力。「卓爾名駒」跑兩仗表現已見進步，上仗鬥至最後百多米先減弱，轉谷草可賺級數，作保險腳。
「佳同」隔一個月出只作2課快跳，前仗賺晒步速形勢都斷得急，如「太陽海岸」已回落要回氣。「好精神」上仗突如其來，但今仗對手增強而且表現亦不及「勁飛駿」好。「心中有程」剛戰追勢尚可，但此組強未能一爭。「金刀銀鑽」上季初出田草1400已見走勢，今次初跑谷草2檔成大冷，可小注拖防爆。
第七場 2班 1000米
「善寶」上仗早移出衝不敵後發先至嘅「帝國勇將」，但早前能於此程以21.7末段勁勢力追級際賽亞軍馬「恩格斯」，初戴眼罩起用近期合作好嘅郭立基作膽相對較穩。「帝國勇將」唯一此程未有證明，計谷草能力屬頂級的。「錢照嬴」1000最好，剛戰1200又係放至最後200才斷，回一場跑返1000未可輕視。「紅衣叻叻」此程亦佳，如夠快切入跟守「錢照嬴」後面就可一如「讚賞」般賺形勢爭功。
「金鎸龍華」出必殺技試谷閘才出賽，跑得返屬奇兵一路。
第八場 3班 1650米
「綫路明星」田草1800快放試準後轉谷草能兩度以機動跑法取得1冠1亞，對手未有增強，嬴面仍壓一。「易搏嬴」具2班中下級能力，落3班作賽便有利，而且少有地賽前試泥閘先出，番查近季試完大閘出取得1冠2亞4殿甚佳成績，小心今次出擊。「寶成智星」上次順放僅敗，今仗對手又無快馬可再賺，仍須兼顧。「旺家多寶」久休復出走內疊不利場地追得唔差，復課繼續做到功夫健康轉穩，早已多番於3班入位具能力嘅馬熱身後或會更進。
「蓋世子牙」上仗雖未能完全望空追，但卻不見勢頭。「深智能業」剛戰賽前缺課跑田草表現不過不失，不敵「勇創潮流」卻屬失望。「快人一步」賺內疊衝得順而不敵於馬群緊迫衝刺嘅「綫路明星」，檔位轉差一位已足。
加油呀!!上杉圭!! 賽日密馬 © All rights reserved.
|
