14/11/2020 TKS 2 肥佬移民告別賽 800 賽後報告
White Win 5:3 - Rodgerx2 / 14x2 / 22 ( 2 / 9 / 23 )
White : Gary / 23 / 7 / 25 / Sei Hung / Sammmy / 4 / 26 / 17 / 9 / 14 / 22 / Rodger
Black : LoB / Matthew / 16 / 20 / 28 / Kong / 32 / 15 / 21 / 5 / 11 / 36
14/11/2020 賽後報告 ( Fat Wong )
2020年11月14日在THS既第2主場上演一場”永遠懷念肥佬”告別賽~ 開賽前更有10秒為肥佬默哀儀式 (實情好似係特約記者未SET相機, 部份球員屈膝屈到出現抽筋跡象); 除此之外, 費格占代表一眾THS隊員送上利龜戰衣及THS限定版毛巾一條~ 賽後更會高掛肥佬球衣以示對肥佬既尊敬, 小編親自查問ths領隊證實左日後THS再無”2號”球衣出現, 永遠高掛在隊友既心中~
二打六永遠榮譽第一打手”肥佬”, 佢既多才多藝勝任多個位置, 場內由龍門, 中堅至前鋒, 場外更是球會第一笑匠, 層出不窮既歇後語往往令一眾隊友捧腹大笑~ 並因此深深咁吸引到費格占既賞識, 喺19幾年前以破當時球會紀錄近300磅……體重轉會到二打六開始佢喺THS既球員生涯~
由球會第一門神高月巴拿至搞事第一中堅去到域奇含七, 我相信每位同過佢一隊既隊友都會認同: 同肥佬一隊人人都會笑住咁入場, 並且經常都可以帶著勝利咁離去, 小編都好榮幸可以同佢一隊19幾年
19年後既今日, 俾曼狗黨串足19年既肥佬終於一嘗利龜攞英超冠軍所願,一洗多年來的屈辱~ 並於同年宣佈自己終於可以串返一眾曼狗; 為左避免日後俾人串返轉頭, 佢決定遞紙申請轉會高雲地利城, 並獲得暗曼迷領隊費格占既體諒含淚接受佢既轉會請求.
回顧完畢, 默哀又完成, 比賽正式開始, 哩場紀念賽係由ths長勝將軍肥黃隊vs ths不敗之師肥佬隊, 2隊都聲稱自己未撚輸過, 而哩場既焦點一定係落喺決定左轉會既肥佬身上~ 哩場波賽前盤口為肥佬隊讓1球, 因為大家都預左紀念賽,肥佬最少入一球既緣故, 肥佬首名入球更加熱到賠率只有1賠1.1~
但正所謂天下烏雅一樣黑, 小編親眼看到假波集團如何操縱賽果, 令一眾賭徒輸身家~ 比賽一開波30秒都無, 賽後需要接受廉記調查既肥X, 第一腳就已經施展出利龜名宿謝拉特死亡式橫傅直接交俾今場主角肥佬成半單刀姿態, 但佢賽前收到領隊指示唔可以做首名入球, 所以佢好冷靜咁傳過直線俾前神射手羅渣
輕鬆射成1:0; 佢入完哩球時興奮到攬住肥佬+肥X, 彷彿視大家為隊友~ 假波假到咁都真係好難得~
咁樣先輸一球, 買左下盤既球迷都未回過神, 就見到賽後需要接受廉記調查嫌疑犯B門將盧X上演一幕送禮勤式既撲救, 將一球軟弱無力既射門由零驚險轉化成一個難得既入球~ 門將盧X直接將個波撲左俾前神射手羅渣, 羅渣企定定踩住粒波,仲有時間講埋句, “好波, 盧X, 今晚醒你一隻乳鴿”先輕鬆射成2:0~
費格占眼見上盤開得太易, 自己又學發仔買左半客全主~所以即時收起MVP肥佬留力備用~結果哩個戰術即時湊效, 黑衫既肥黃隊三扒兩撥就已經由前鋒鐵三角阿RICK+COLLIE+MARCUS就輕鬆反超3:2; 個感覺真係一切盡在我掌握中, 半場真係客隊領先3:2完場, 比賽跟住就進入膠著既狀態~ 費格占眼見完成左一半既半客全主當然要繼續操作, 即時派返懷疑收足錢需接受廉記調查嫌疑犯肥X出場~
肥X果然不負眾望, 其實真係短短既10分鐘, 首先先跟甩球皇DEE, 俾佢輕鬆拖橫攞尾柱追成3:3~ 哩球波之假係要大家既配合, 翻查資料球皇DEE 近10年都未曾試過可以禁區頂射得入波, 雖然個波唔算太勁, 仲要係慢流尾袋式既”軟”射, 咁當然有肥X俾佢扭過再配合盧X扮集中但無打算撲救既”演出”, 球波先會成立到~
得勢不饒人既肥佬隊繼續狂攻, 成條後防更加係無厘頭到喺無越位既9人場度,全條後防企定定舉手擺越位, 最後由泰仔接應阿偉橫傳輕鬆射成4:3; 去到補時階段肥X為左個主其他更加係心臟地帶派膠, 直接將個波送俾對方射手球皇DEE, 後者不負所望輕鬆射成5:3~
球證見到費格占露出勝利既笑容, 隨即吹雞完場~ 哩場”永遠懷念肥佬”告別賽都曲終人散~小編見證一場假到爆既假波, 不過老土d講句, 賽果並唔重要, 今日每位在場既隊友都為肥佬送上衷心既祝福~
正所謂天下無不散之筵席, 哩篇賽後報告係由副領代唔識字文盲領隊費格占代筆編輯, 最後為肥佬送上一句…………
“肥佬, 你好叻wor, 個”一”字寫得好直wor”
哩個一係 “一路順風” 個一~ 再見肥佬~
[ 本帖最後由 no.14 於 20-4-2021 02:42 PM 編輯 ]
附件: 您所在的用戶組無法下載或查看附件
