曼城兵變反文帥

歐聯豪門夜劫 75億大軍包艇
歐洲豪門大災難，四支名牌皇家馬德里、曼城、AC米蘭及阿仙奴齊於周四凌晨歐聯分組賽輸波！球員總身價達6億鎊（約75億港元）嘅曼城背水一戰，竟然作客1比3不敵阿積士，領隊文仙尼跪低扯白旗投降，承認自己要為失利負全責，頹爆話想出線必須靠奇迹。陣中貴價兵乘機造反，米卡李察士公開質疑文帥戰術失誤，擺明想送佢一程。加上曼城球迷喺場外搞事被捕，隨時被歐洲足協秋後算帳，令呢支英超盟主陷入內憂外患之中。