17/08/2024 中山公園 VS NICKY 630 win 3:2 賽後報告
17/08/2024 賽後報告
二打六因為多名球員要坐越季波監,再加埋有D外借既球員來試腳,基本上個正選陣容可以用面目全非黎形容。更甚既係連領隊費占都因場外行為不檢被罰停賽未能親自統帥, 由副領代之。
賽前先同對手NICKY先禮後兵揸揸手,問一問可唔可以踢9個, 對方唔領情, 唯有硬著頭皮踢8個。副領襯費占不在場使用自己獨門戰術”削氣戰術”, 後生既出去削一削對方D氣先，球迷望一望後備席廂陣容星光熠熠都顯得有D枯燥; 球王DEE, 阿簡同阿泰都只能喺場外等待時機。
但勢估唔到對方領隊都有此一著, 擺出一個你留力時我都留戰術。二打六三爬兩撥, 真係淥個麵既時間已經早早領先。開左波唔夠3分鐘, 對方年齡應該唔太後生, 後場都應該個個4-5張走唔甩, 二打六前場快速迫搶截到對方誤傳, 阿康右路傳中,由新外援門前輕易掃入射成1:0。第一球入左, 連REPLAY都未播完, 斬下眼二打六由叉雞連斬2野,終於傳到俾伏兵門前既阿康射成2:0。
真係話咁快就2:0, 費事”咩話40:0”, 並且眼見對方領隊開始踢到喺場內係咁屌係咁屌, 為免又少一隊, 所以副領即場作出調動, 換入賽果控制員球王DEE控一控場。早早領先2:0,仲要換入咁多球星, 馬會即場投注二打六讓球由-2居然不升反跌到-1.5, 心水清既球迷都知控制員一出,場波已經一切盡在我地掌握中。
球王DEE果然不負眾望, 眼見必入既波突登唔入, 太易既波唔會想入,難入既波就更加唔會入。宅心人厚既球王DEE, 2次單對單對住徬徨無助既龍門,第一次佢選擇左寬恕,而第2次佢選擇左憐憫,之後再有懷疑人生既慢步單刀都全部一一拒絕送個波入龍, 真漢子話唔入就唔入。
結果當然係老無病喇,你唔入時,人地又識D兵法,原來收埋左個快既後生仔喺後備。對面有個13號金毛一落場幾球個人突破連番施射, 即令二打六後場響起警號。NICKY隊比較鍾意藉著踢8個,球場相對多空位, 翼/閘走盲眼位,由後場9斬空位, 可惜準繩度一般。直至換入13號後就開多飯, 由佢自己前場個人突破, 終於喺完半場前佢自己推入禁區, 門前波子機式混戰,快過豪龍搵到粒波近門執雞篤入成1:2。
眼見賽事又緊湊返,球王DEE功成身退回到後備席包廂, 轉個頭新外援又一球半單刀冷靜地波熨射成3:1,為二打六拉開返個差距,處子作個人梅開二度。之後戰況有一段膠著既狀態, 雙方都互有攻勢。去到最後3分鐘, 二打六後場收到ORDER勒一勒韁繩, 放軟左手腳俾對面13號自己再自爆多一下追成3:2; 上盤客眼見只淨3分鐘, 最後連個本都無埋, 血本無歸。
控制戰局黎講都控制得唔錯, 因為賽後費占好快就收到對方傳來覆桌既回應, 坐緊監/波監既佢老遠都應該感到老懷安慰。
** Hong / helper x 2 ( 3 )
** Attn : Hong / 14 / 17 / 21 / 5 / Calvin / 3 / 28 / 22 / Helper x 3
