undefined undefined

有分析有策略最重要公開分享！好嘢！

TIPS OK 自己唔太OK，主因投注策略問題，檢討檢討！

我都係成日因投注策略累事,一齊加油

good

賽道分析：對上一次谷草賽事選用全闊A跑道，距今已兩個星期，加上C跑道一向內疊馬優勢較大，如賽事非雨中進行預期內疊馬優勢會頗大，當然最穩陣都係留意臨場動向。

第一場 5班 1000米
12.盈驥 4.足球快綫 8.華劍寶 7.滿貫之寶
「盈驥」已有兩季多冇嬴馬，現時評分新低點，上季尾轉倉都係想重回凱旋門，上仗縮落1000有返D走勢，今仗再遇「足球快綫」，但此駒排檔內移而同場至少有3-4匹早段會鬥搶形成快步速，無論跟「華劍寶」或搶先切入內檔都十分好跑，1､2檔都會慢的，作膽最穩。
「足球快綫」上仗賽後隔6日先復課對呢類健康有過事嘅馬非好現象，埋門叫都有落去彈課泥閘，預期8檔因應快馬多可切入2疊，跑出正常水準會夠爭。
「華劍寶」上季嬴田草1400，季內初出及次仗轉泥地不利追大慢閘下表現都唔差，現時雖落腳較慢，但3檔仍大有機會取天然好位，騎練組合唔差，力足作配。
「滿貫之寶」上季就於此程嬴當時頗銳嘅「千笑」，上仗利內疊下全程走3疊遊馬河，今次轉蔡明紹發揮或不比喜全程外疊蝕嘅巫記差，肯放棄早段或可一爭。
「鑽飾彩虹」及「有情風」落5班有利，但一齊排外檔先行跑法要切入好位一D都唔易。「千笑」上仗步速放啱斷得快，等跑多兩仗季中才諗。「瀟洒靚龍」剛戰步速飛快唔太斷，今次6檔如能切入2疊或可爭3-6名。
第二場 5班 1650米
2.的確好靚 4.飛天龍駒 10.天子駕六 12.森淼盛
「的確好靚」上季此程只負於「金玉之光」而田草1400只負於今季連番有好表現嘅「飛快威」及「豐彩人生」，甚具惡氣，季內熱身後表現有進，上仗如非受阻已能衝嬴大賺嘅「京城精英」，對手非強作膽信心較大。
「飛天龍駒」剛戰力戰到底嬴馬而回，嬴完田草轉以往此場地1200有不俗成績嘅谷草會有賺，用力多幸休兩日已復課，一如上仗排位朝彈細閘，5檔可再守好位，屬前駒最大對手。
「天之駕六」上仗於無偏差場地應要再追好D，季內嬴谷草姿態唔錯，11檔後追馬仍可兼顧。
「森淼盛」上季田草能力拼「鐳射槍」，今季只一仗泥地大敗，失準馬唔使睇近績，跑得返水準現時呢個評分可出冷。
「京城精英」排檔外移欠信心。「金威神童」休出表現一般。「彪形好漢」極慢步速賽事上名又未能證明太多，成熱只宜拖。「無敵駿駒」上仗賽後翌日驗到不良於行，轉以往都得嘅谷草未能睇得咁死。「財富之星」操足才作賽，1檔有利形勢居邊線。
第三場 4班 1650米
3.龍船快 6.烈風天馬 7.錢程萬里 11.青出於藍
「龍船快」連續兩仗嬴極慢步速賽事，本以為水準唔高，怎料上仗守好位下嬴得更輕易，告仔喜盡用此類銳開嘅馬，同場快馬少又可再賺，有望季內第4捷。
「烈風天馬」季內頭兩仗無甚表現，收埋操一個月剛戰增程1650表現甚令人驚喜，極慢步速賽事能以全場最快末段22.68追近，今次如場地非大蝕可爭勝。
「錢程萬里」上仗利內疊B欄賽日沿途走外疊唔夠快切入，今次用返鄭雨滇冇馬放嘅情況下甚好跑，只要肯於對面直路開始加快盡用均速性能就能由蟲變龍。
「青出於藍」今季初出於田草1400走不利外疊現追勢，上仗縮1200又能追一段22.47，如今仗步速唔快因應跑開短途前速守好位鬥爆衝22秒幾出冷唔奇。
「雪山神駒」落4班甚惡，但12檔慢步速要靠追難搞。「安陶」上季初出3班追近落4班已可，但轉倉一出就報谷草中距離用人都唔似，似試馬多。「金得意」上仗平常要場地大賺先得。「財源來」同樣排檔外移慢步速面臨考驗。「旅遊小子」近兩仗都有意外，今次若能因應慢步速搶前放或可一爭。「幸運勇士」季內完全冇FORM，近先諗。
第四場 4班 1200米
1.威威加瑪 2.多綵 4.歡欣星 6.金滿載
「威威加瑪」現時已學識拍住放纏鬥，唔同以往一齊燒就散，季內兩仗跑3班強組快步速都唔斷，今仗落4班即強配柏寶，對手無快馬可輕鬆前領一放而回。
「多綵」上仗B欄利內疊情況下沿途走3疊唔斷仲可以追過該仗步速大賺及後轉泥地嬴嘅「神童」，今次睇排檔必可反先「銀飛龍」，但馬房､馬主向來與馬偉昌冇交收，用人成一大疑問作配。
「歡欣星」上季嬴田草1400夠級數，今季唔急慢慢操足追返D進度先出，有黃金一檔之助成冷更值搏。
「金滿載」剛戰初出跑1000米，當日頭4場壓地前內疊馬甚為有利，此駒能走3疊以22.3秒全場最快末段最近著實不易，但留意季內數匹1000上1200嘅馬如「紅運福星」､「銀桂飄香」都有阻力，作配較合。
「銀飛龍」大賺慢步速嬴後排檔轉外不易再勝。「生豪」上仗賺場地下只能取得一席無威脅嘅亞軍，排檔外移用韋達亦未必有大幫助。「你好我好」縮短途賺形勢提升名次後再度增程，對手強例追都止於3-6名。
第五場 4班 1650米
10.香港發 12.回鄉精神 5.喜樂洋洋 6.神州八號
「香港發」田草險勝後轉谷草賺場地形勢再嬴，上仗臨時換人排5檔都要全程3疊遊馬河，直路早段已冇騎但仍見湧上，今次回配馬偉昌而抽到好檔，此組4班唔強可爭季內第3捷。
「回鄉精神」現時評分比嬴馬時低11分，以往成日唔打得鞭收收埋埋用，今仗轉倉初出戰意必高，排8檔但對此匹例追一段嘅馬影響唔算好大，夠爭一位。
「喜樂洋洋」同父馬增程更好，但季內追落勢頭唔強的，幸有內檔之助柏寶亦MARK實唔放手，可作配。
「神州八號」減分已足，比前季嬴馬低17分，而前仗試後上仗試前均不俗，分已到位可再爭。
「財神駕到」上仗好位衝都唔衝，前仗嬴得已見辛苦，續負頂磅不易再爭。「閃耀小子」立心減分落4班博惜抽到大外檔。「太奇妙」上仗雖蝕快步速，但斷得急，季內叫初跑谷草有內檔有膽才拖。「神勇馬車」交代後減分再重新部署。「威駿寶」上仗增程表現非佳。「雙月灣」同樣增程太急。「高明威威」此馬房唔使睇近績，如有手影一檔可加入戰團。
第六場 3班 1650米
3.勁綵 5.晨采 10.豁達瀟灑 9.勁嬴晒
「勁綵」嬴馬當日尾兩場外疊有得追的，亞軍「銘記心頭」上2班能補中，此駒該仗快步速頂到表現極為出色，計級數此駒跑3班田草都夠惡，上季此程落敗只因騎者轉彎飛出7､8疊，今仗更有內檔､形勢之助大可連捷。
「晨采」此程5戰取得4亞甚準，剛戰快步速跟跑下只負於賺步速及田草級數嘅「非常精」，有內檔續爭一席。
「豁達瀟灑」上仗超慢步速下走大外疊追得甚勁，今次更有內檔，惜用合作少嘅郭立基而且未退熱，作配才合。
「勁嬴晒」休出跑田草追得不俗，於谷草會夠級數，同父馬谷草適應力強，負輕磅亦能一爭。
「一團威」有1檔未能睇低，上仗沿途外檔一入直路無耐騎者已企起身冇騎過。「超綵」此程取得1冠1亞評分上調後已非有利。「強中堅」前仗受阻基本上冇跑過，有3檔強配李寶利亦可加入一爭。
第七場 3班 1650米
4.首飾孖寶 6.喜勁駒 8.共同目標 11.路路發
「首飾孖寶」具田草3班中距離中堅能力，轉谷草又係可賺，上仗初跑田草不利慢步速下於外疊追得甚勁，只以短頭不敵「喜競寶寶」，今仗有內檔之助可言勝。
「喜勁駒」剛仗田草強組跑入一席，見無機會爭冠早已放柔，轉返以往得嘅谷草有好檔亦有力爭勝。
「共同目標」上仗田草中距離轉彎走多咗下頂得住一席季軍，與亞軍「綠色威」爭得唔遠此組亦會夠，3隻強中強之一。
「路路發」血統長優於短，季初跑田草1200已追得甚勁，外地增程1600即大勝而回，今仗屬奇兵一路。
「幸運金龍」上仗表現平常。「悅璐孖寶」剛戰騎者輕鬆競跑都能以快末段一齊衝近，但今仗12檔唔易克服。「綫路明星」上仗內疊追落唔多。「寶成智星」上仗大賺步速只能跑入季席，對手仍強再大賺也止於一席。「威仔皇」轉倉出賽追勁尚可，但未見大進，此組仍能爭3-5名而已。
第八場 3班 1200米
8.帝國勇將 9.城中話題 4.尊勝福星 10.中國動力
「帝國勇將」谷草能力一如同父嘅「鐵胆龍」跑高一截，上仗如非受阻能更具威脅，今仗強敵已去坐位望嬴。
「城中話題」轉倉初出跑田草直路受阻下衝得唔差，上仗轉田草1400因應對手受阻而取得亞席，幸轉谷草1200作賽大賺級數，有內檔能切入一疊更能提升機會。
「尊勝福星」韋達騎非最佳，因唔能夠盡展其均速性能，好在4檔而同場冇領放馬，只要第二段肯加快就可加入爭勝。
「中國動力」季內初出，上季跑3班未見有優勢，但今場如「尊勝福星」順放就會大賺，可爭腳。
「軍功」上仗1000追勢尚可，轉谷草排11檔卻難預安心。「勁有盈」用得好盡現評分欠優勢。「芙蓉之寶」10檔要切入2疊都唔容易，級數足但要睇非凡際遇才可搏。「讚賞」剛戰組別追近此組夠，但8檔都好大機會要走3疊，留後追又未必夠「帝國勇將」等衝。