利物浦搶簽亨特拉爾

利物浦自意大利射手波連尼受傷長抖後，目前可用前鋒不多。英國《每日星報》報道，主帥羅渣士急需一名有實力嘅前鋒分擔烏拉圭射手蘇亞雷斯嘅壓力，効力德甲史浩克04嘅29歲荷蘭前鋒亨特拉爾合約將於明年到期，紅軍已決定於1月出手搶先簽入這位高效率射手。
《每日星報》透露，合約於明年6月到期嘅亨特拉爾，目前與球會嘅續約談判已擱置，按德國媒體報道，雙方將於12月重新展開談判。這現狀無疑給利物浦機會，紅軍目前飽受前鋒荒，亨特拉爾一直保持較高嘅入球率，而且屬於可一錘定音嘅射手，完全符合紅軍嘅要求。
其實，有耐性嘅球隊可等待亨特拉爾合約到期先至免費招攬佢加盟，但紅軍明顯等唔切，球隊願意在1月支付一筆轉會費簽下荷蘭射手。此外，按目前紅軍嘅影響力，在免費簽約時未必有能力與阿仙奴或熱刺競爭。隨着年紀漸大，亨特拉爾於冇波走位和機會把握上顯得更老練，實用性無疑是目前紅軍最需要嘅。亨特拉爾加盟紅軍可助蘇亞雷斯獲得更多空間，兩人皆曾効力過阿積士，一位是專門嘅射手，一位是全面突擊手，相信兩人可產生不少化學作用。