紅軍睇中韓小將張賢秀

明年1月搶撬亨特拉爾
奉行年輕化政策嘅利物浦繼續喺全球發掘足球天才，日本傳媒指効力FC東京嘅南韓小將張賢秀被「紅軍」睇中，試腳後有機會進軍英超大舞台！
希丁克卡路士賽前獻花
日本傳媒報道，南韓U21小將張賢秀會喺12月到利物浦試腳1周，順利嘅話「紅軍」極有可能以100萬鎊（約1,200萬港元）將佢收歸旗下。21歲嘅張賢秀喺日職FC東京司職中堅，能攻擅守啱晒羅渣士嘅進攻足球理念，亦可以滿足曾要求佢哋簽亞洲球員嘅贊助商渣打銀行。
同時，英國《每日星報》亦話利物浦會喺明年1月搶簽亨特拉爾補充鋒力，報道指呢位29歲前鋒將於季後約滿史浩克04，但「紅軍」為免要同熱刺、阿仙奴等球會競爭，寧願畀少少錢盡早買人。另方面，英國《每日快報》指安治領隊希丁克，將聯同卡路士及伊度奧喺今晚賽前，喺晏菲路球場外嘅希爾斯堡事件紀念碑獻花，悼念96位死難者。